चीनलाई उछिन्दै भारत विश्व कै सबैभन्दा बढी हतियार आयात गर्ने देश

चीनलाई उछिन्दै भारत विश्व कै सबैभन्दा बढी हतियार आयात गर्ने देश बनेको स्वीडेनको एउटा संस्थाले जनाएको छ। स्टकहोम इन्टरन्यासनल पिस रिसर्च इन्स्टिच्युट (सिप्री) को प्रतिवेदन अनुसार भविष्यमा पनि भारत बढी हतियार आयात गर्ने देशका रुपमा रहिरहने देखिन्छ।
साढे ३२ अर्ब अमेरिकी डलर रक्षा बजेट रहेको भारतले ७० प्रतिशतभन्दा बढी हतियार आयात गर्ने गर्छ।

आफ्नो सशस्त्र फौजलाई आधुनिकिकरण गर्न आगामी पाँच वर्षमा भारतले थप ५० अर्ब डलर खर्च गर्न खोज्दैछ। यसमा १० अर्ब डलरको १२६ नयाँ फाइटर जेट किन्ने सम्झौता पनि पर्छ।
चीनको बढ्दो शक्ति र पाकिस्तानसँगको पुरानो प्रतिद्वन्द्विताबीच भारतले हतियार खरिद गर्न बढी रकम खर्च गर्न थालेको हो।
इन्स्टिच्युटका अनुसार चीनले घरेलु हतियार उद्योगको विकास गरेकोले हतियार आयात गर्नेमा ऊ दोस्रो स्थानमा झरेको हो।
हतियार बेच्नेमा भने अमेरिका पहिलो स्थानमा रहेको छ। अमेरिकापछि रुस र जर्मनी हतियार बेच्ने देशहरुको सूचिमा दोस्रो र तेस्रो संख्यामा छन्।